Liban, nënshkruhet dekreti për formimin e qeverisë së re

Presidenti i Libanit, Michel Aoun dhe i ngarkuari me detyrën për formimin e qeverisë së re në vend, Najib Mikati nënshkruan dekretin lidhur me formimin e qeverisë së re, transmeton Anadolu Agency (AA).

Aoun u takua në rezidencën presidenciale Baabda me ish-kryeministrin Mikati i cili më 26 korrik u caktua me detyrën për formimin e qeverisë së re në vendin e qeverisë së Hassan Diab i cili dha dorëheqje më 10 gusht 2020 pas shpërthimit të ndodhur në portin e Bejrutit.

Në një deklaratë nga Presidenca thuhet se Aoun dhe Mikati ranë dakord mbi kabinetin e ri.

Gjatë nënshkrimit i pranishëm ishte edhe kreu i Parlamentit, Nabih Berri.

Situata ekonomike dhe politike në Liban

Libani i cili ka një strukturë të brishtë sa i përket ndarjeve politike të bazuara në fe dhe sekte të ndryshme, po përjeton krizën më të madhe ekonomike që nga lufta e brendshme 1975-1990.

Shpërthimi i madh që ndodhi në portin e Bejrutit në gusht 2020, rriti problemet ekonomike në Liban dhe krijoi një krizë të re qeveritare.

Qeveria e kryeministrit Hassan Diab dha dorëheqjen më 10 gusht 2020 nga reagimet e ardhura pas shpërthimit, por prej më shumë se një viti qeveria e re në vend nuk është formuar për shkak të mosmarrëveshjeve mes grupeve politike.

Presidenti i Libanit, Aoun më 26 korrik caktoi ish-kryeministrin Mikati me detyrën për të formuar qeverinë e re.