Erbil Başay
09 prill 2019•Përditësim: 09 prill 2019
Kancelarja e Gjermanisë, Angela Merkel, ka pritur në një takim në Berlin kryeministren e Britanisë, Theresa May, raporton Anadolu Agency (AA).
Takimi midisi dy lidereve, që zgjati rreth një orë e gjysmë, u zhvillua i mbyllur për mediat në ndërtesën zyrtare të kancelares gjermane.
Mediat gjermane raportuan se Merkel dhe May kanë kërkuar parandalimin e largimit të Britanisë pa marrëveshje nga Bashkimi Evropian (BE), të caktuar për më 12 prill, dhe kanë shkëmbyer mendime para Samitit të Liderëve të BE-së që do të mbahet nesër lidhur me Brexit-in.
Mediat gjithashtu kanë shkruar se May ka riafirmuar kërkesën për shtyrjen e Brexit-it deri më 30 qershor.
Pas Gjermanisë, May do të udhëtojë drejt kryeqytetit të Francës, Paris, ku sonte pritet të takohet me presidentin Emmanuel Macron.
Ndryshe, marrëveshja e kryeministres britanike për largimin e vendit të saj nga BE-ja është refuzuar tri herë në parlament.
Brexit, i paraparë fillimisht të ndodhë më 29 mars sipas kalendarit normal, është shtyrë për më 12 prill pas një marrëveshjeje me BE-në.
Në samitin që do të mbahet nesër lidhur me Brexit-in është paraparë të kërkohet shtyrje e re e procesit.
Britania vendosi të largohet nga BE-ja pas një referendumi që u mbajt më 23 qershor të vitit 2016.
Më 29 mars të vitit 2017, vendi aktivizoi nenin 50 të Marrëveshjes së Lisbonës, sipas të cilit rregullohet procesi i largimit nga Unioni, duke inicuar procesin dyvjeçar të negociatave.
