Iran, në shembjen e rrokaqiellit jetën e humbën 20 zjarrfikës

TEHERAN (AA) - Të paktën 20 zjarrfikës e kanë humbur jetën dje në rrëzimin e një rrokaqielli në kryeqytetin e Iranit, Teheran, raporton Anadolu Agency (AA).

Ndërtesa ishte ndërtuar 50 vjet më parë, ndërsa në shuarjen e zjarrit ishin përfshirë shumë ekipe zjarrfikëse, para se ndërtesa të shembej.

Sipas të dhënave paraprake, jetën e kanë humbur 20 zjarrfikës, kurse presidenti i Këshillit të Shëndetit dhe Mjedisit në Teheran, Rahmetullah Hafizi ka shprehur shqetësimet se numri i të vdekurve mund të rritet, sepse në shuarjen e zjarrit në katin e gjashtë dhe të shtatë merrnin pjesë diku 30-40 zjarrfikës.

Hafiz theksoi se ka mundësi të mos ketë të mbijetuar.

"Numri i të vdekurve mund të rritet në 40", shtoi ai.

Zëdhënësi i Zyrës për fatkeqësitë natyrore në Teheran Hasan Abbasi ka konfirmuar se 84 persona janë plagosur, kryesisht zjarrfikës.

Ende vazhdojnë operacionet e kërkimit-shpëtimit.