Grupi Hezbollah i Libanit tha se ka shënjestruar tre baza ushtarake në Izraelin verior dhe në Lartësitë e Golanit në Siri të pushtuara nga Izraeli me raketa dhe dronë, transmeton Anadolu.

Në tre deklarata të ndara, grupi tha se sulmet janë në përgjigje të asaj që e përshkroi si agresion të Tel Avivit kundër Libanit.

Hezbollahu tha se sulmet e tij janë "të kufizuara në objektiva ushtarake" dhe se ka nisur një seri dronësh kamikazë në vendet e radarëve dhe dhomat e kontrollit në bazën ajrore "Ramat David" në Izraelin verior.

Grupi njoftoi se ka shënjestruar bazën "Meron", e përdorur për mbikëqyrje dhe menaxhim të operacioneve ajrore në Izraelin verior, me një tufë dronësh kamikazë dhe se sulmi dëmtoi një nga radarët e bazës dhe një ndërtesë komande.

Në një operacion të tretë, Hezbollahu tha se ka nisur një "breshëri të madhe raketash" në bazën Nafah, selinë e Divizionit të 210-të Bashan, në Lartësitë e Golanit.

Nuk pati asnjë koment të menjëhershëm nga ushtria izraelite mbi sulmet e raportuara.