Harris: Si presidente do të punoj për t'i dhënë fund luftës në Gaza

Zëvendëspresidentja e SHBA-së dhe kandidatja presidenciale e Partisë Demokratike në zgjedhjet e 5 nëntorit, Kamala Harris tha se "do të bëjë çmos për t'i dhënë fund luftës në Gaza dhe për të siguruar të drejtën e palestinezëve për vetëvendosje", transmeton Anadolu.

Harris foli në fushatën zgjedhore të mbajtur në Michigan, një shtet ku janë të përqendruar muslimanët dhe arabët amerikanë.

Duke thënë se ky vit ka qenë i vështirë për shkak të asaj që ndodhi në Gaza dhe Liban, Harris tha: "Si presidente, do të bëj gjithçka që mundem për t'i dhënë fund luftës në Gaza".

Ajo theksoi se do të punonte gjithashtu në shkëmbimin e të burgosurve. "Përfundimi i vuajtjeve në Gaza do të sigurojë sigurinë e Izraelit si dhe të drejtat e palestinezëve për liri, siguri dhe vetëvendosje", tha Harris.

- Rëndësia elektorale e Michiganit

Ndërsa ka rreth 242 mijë muslimanë në Michigan, një nga shtetet e luhatshme, si republikanët ashtu edhe demokratët i kushtojnë rëndësi të madhe votave të muslimanëve.

Votat e muslimanëve në Michigan tradicionalisht shkonin për Partinë Demokratike. Pas 7 tetorit 2023, votuesit muslimanë kritikuan politikën e administratës së presidentit Joe Biden ndaj Gazës ku Izraeli akuzohet për gjenocid.

Disa liderë të komunitetit musliman në Michigan më 27 tetor njoftuan se do të mbështesnin kandidatin republikan Donald Trump, sepse ai tha se do t'i jepte fund luftës në Lindjen e Mesme dhe Ukrainë.