Şahin Demir
07 tetor 2026•Përditësim: 07 tetor 2026
Jordania dhe SHBA-ja diskutuan të mërkurën mënyrat për zhvillimin e bashkëpunimit ushtarak dhe zgjerimin e partneritetit ekzistues mes forcave të tyre të armatosura, njoftoi ushtria jordaneze, transmeton Anadolu.
Gjeneralmajor Majdi Mohammed Al-Harasis, kryetar i Shtabit të Përbashkët të Forcave të Armatosura të Jordanisë, ka pritur gjenerallejtënant Kevin Leahy, komandant i Ushtrisë Qendrore të SHBA-së, dhe delegacionin që e shoqëronte, thuhet në një deklaratë të Forcave të Armatosura të Jordanisë.
Në deklaratë thuhet se të dyja palët diskutuan mënyrat për forcimin e bashkëpunimit ushtarak dhe zgjerimin e partneritetit të tyre në mbështetje të përpjekjeve të përbashkëta për promovimin e sigurisë dhe stabilitetit.
Takimi u zhvillua në një kohë kur negociatat mes SHBA-së dhe Iranit kanë ngecur, ndërsa Teherani ka deklaruar muajt e fundit se ka shënjestruar baza dhe objekte që strehojnë forcat amerikane në Jordani, në kundërpërgjigje ndaj sulmeve amerikane në territorin iranian.
Sipas deklaratës, Leahy ka shprehur vlerësimin për “rolin kyç” të Jordanisë dhe forcave të saj të armatosura në promovimin e sigurisë dhe stabilitetit në nivel rajonal dhe ndërkombëtar.
Në takim kanë marrë pjesë edhe zyrtarë të lartë ushtarakë jordanezë dhe atasheu amerikan i mbrojtjes në Aman.
Bisedimet u zhvilluan më pak se dy javë pas përfundimit të stërvitjes ushtarake “Eager Lion 2026”, e cila u organizua për herë të parë nga SHBA-ja në bashkëpunim me Forcat e Armatosura të Jordanisë dhe Komandën Qendrore të SHBA-së.
Stërvitja filloi në Kolorado më 15 shtator me pjesëmarrjen e më shumë se 200 ushtarakëve jordanezë dhe amerikanë. Ajo përfshiu trajnime në luftën kundër terrorizmit, mbrojtjen ajrore, sigurinë detare dhe kibernetike, si dhe reagimin ndaj fatkeqësive dhe krizave.
Stërvitja përfundoi më 25 shtator, ndërsa ushtria jordaneze tha se ajo kontribuoi në forcimin e partneritetit, shkëmbimin e ekspertizës dhe përmirësimin e aftësive të përbashkëta operacionale.
Në korrik, Jordania dhe SHBA-ja zhvilluan takimin e 45-të të Komitetit të Përbashkët Ushtarak, në kuadër të bashkëpunimit dhe koordinimit të vazhdueshëm ushtarak mes dy vendeve.
