Francë, rritet numri i të vdekurve nga moti i keq

PARIS (AA) - Numri i të vdekurve në rajonin jugor të Francës, Aude, për shkak të reshjeve të rrëmbyeshme dhe përmbytjeve është rritur në 7, transmeton Anadolu Agency (AA).

Në deklaratën nga Ministria e Brendshme, theksohet se numri i të vdekurve nga reshjet është rritur në 7 ndërsa, 5 persona të tjerë të plagosur rëndë janë dërguar në spital.

Kryeministri dhe ministri i Përkohshëm i Brendshëm, Edouard Philippe, është njoftuar se do të vizitojë vendin, ndërsa sipas vlerësimeve të para në rajon nuk mund të furnizohen rreth 10 mijë shtëpi me energji elektrike.

Në kumtesë bëhet e ditur se shumë ndërtesa banimi dhe ato afariste kanë mbetur nën ujë, pasi në disa vende uji ka arritur një lartësi prej 1.5 metra.

Nga shkaku i reshjeve të shumta, erës së fortë dhe përmbytjeve, në këtë rajon francez është shpallur meteoalarmi i kuq.

Shkollat nuk punojnë, ndërkohë që qytetarët janë udhëzuar të mos dalin nga shtëpitë e tyre pa nevojë.

Ekspertët njoftuan se në rajon nuk janë parë reshje kaq të rrëmbyeshme që nga viti 1891.