Erdoğan diskuton çështjet dypalëshe dhe rajonale me homologun e tij somalez

Presidenti i Türkiyes, Recep Tayyip Erdoğan, i tha homologut të tij somalez se Türkiye qëndron me Somalinë në luftën kundër terrorizmit, transmeton Anadolu.

Drejtoria e Komunikimeve e Türkiyes njoftoi se presidenti Erdoğan zhvilloi një bisedë telefonike me homologun e tij somalez, Hassan Sheikh Mohamud, me të cilin diskutoi marrëdhëniet dypalëshe, luftën kundër terrorizmit dhe çështjet globale dhe rajonale.

Erdoğan i tha bashkëbiseduesit të tij se Türkiye qëndron pranë Somalisë në luftën e saj kundër terrorizmit, thuhet në deklaratë.

Ai tha se bashkëpunimi mes dy vendeve do të vazhdojë të rritet.

Presidenti i Türkiyes gjithashtu tha se tensioni "shqetësues" midis Etiopisë dhe Somalisë duhet të përfundojë duke marrë për bazë integritetin territorial të Somalisë.

Türkiye të enjten shprehu shqetësimin për Memorandumin e Mirëkuptimit të nënshkruar nga Etiopia dhe rajoni i shkëputur i Somalisë, Somaliland.

Memorandumi i Mirëkuptimit u nënshkrua të hënën, duke i dhënë Etiopisë qasje në Detin e Kuq përmes portit të Berberës në Somaliland.

Etiopia humbi portet e saj të Detit të Kuq në fillim të viteve të 90-ta pas Luftës së Pavarësisë së Eritresë, e cila zgjati nga 1961 deri në 1991.

Në vitin 1991, Eritrea fitoi pavarësinë nga Etiopia, duke çuar në krijimin e dy kombeve të veçanta. Ndarja rezultoi që Etiopia humbi qasjen e drejtpërdrejtë në Detin e Kuq dhe portet kryesore.

Që atëherë, Etiopia ka qenë pa dalje në det, duke ndikuar në aftësinë e saj për të kryer tregti efikase detare.