Ekstradohet në SHBA trafikanti më i madh kolumbian i drogës

Dairo Antonio Usuga, i njohur edhe si “Otoniel”, lideri i klanit Golfo (Clan del Golfo), u ekstradua në SHBA të mërkurën me akuzën e trafikut të drogës, raporton Anadolu Agency (AA).

Usuga ishte bosi kolumbian i drogës më i kërkuar para se të kapej në tetor 2021 pas një operacioni masiv ushtarak.

Presidenti kolumbian Ivan Duque tha se Usuga është tregtari më i rrezikshëm i drogës në botë.

“Do të doja të njoftoja ekstradimin e Dair Antonio Usuga, tregtarit më të rrezikshëm të drogës në botë, vrasës i liderëve socialë dhe policisë, abuzues i djemve, vajzave dhe adoleshentëve”, shkroi Duque në Twitter.

I rrethuar nga një kolonë e madhe policie, Usuga u transportua nëpër rrugët e kryeqytetit Bogota në një bazë ushtarake të mirëmbajtur, ku iu dorëzua zyrtarëve amerikanë të Drejtorisë për luftë kundër drogës.

“Si kandidat, premtova se do ta kapja dhe do ta ekstradoja këtë kriminel të llojit më të keq dhe ne kemi përmbushur detyrimin tonë ndaj Kolumbisë”, tha Duque.

Në Kolumbi, gjithsej 128 urdhër-arreste janë lëshuar për Usuga (50) për krime si trafik droge, zhvatje, vrasje, zhvendosje të detyruar, trafik armësh, formim grupesh të armatosura, komplot për të kryer krime dhe krime kundër njerëzimit.

SHBA-ja akuzon Usuga-n dhe klanin e tij për kontrabandë të kokainës në vend midis viteve 2003 dhe 2012. Ekstradimi i tij u krye më në fund pasi Këshilli i Shtetit Kolumbian hoqi një masë që e pengonte të largohej nga vendi me kërkesë të viktimave, të cilët pretendonin se ekstradimi i tij do të cenonte të drejtën e tyre për të ditur të vërtetën dhe për të marrë dëmshpërblim.

“Ky kriminel u ekstradua për të vuajtur dënimin për trafik droge në SHBA. Por, dua të jem i qartë se pas vuajtjes së dënimit, ai do të kthehet në Kolumbi për të paguar krimet e kryera ndaj vendit tonë”, tha Duque.

Ai shtoi se Usuga do të vazhdojë të bashkëpunojë me autoritetet kolumbiane në hetimet nga SHBA-ja.

Qeveria kolumbiane ofroi një shpërblim prej 800 mijë dollarësh për informacion rreth vendndodhjes së tij përpara se ta kapte pranë kufirit me Panamanë.