Sena Güler
29 Maj 2019•Përditësim: 30 Maj 2019
Autoritetet egjiptiane kanë vendosur të nisin një hetim të ri dhe të riarrestojnë gazetarin e Al Jazeera për të cilin një gjykatë vendosi lirimin e tij javën e kaluar pas dy vitesh e gjysmë i privuar nga liria, transmeton Anadolu Agency (AA).
Lirimi i Mahmoud Hussein u inicua të shtunën, ndërsa ai u dërgua në stacionin e policisë në Giza për lirim nga burgu Tora, tha familja e tij në një deklaratë.
Gjatë procesit, Prokuroria e Sigurisë Shtetërore e ka intervistuar atë në lidhje me një rast të ri dhe i ka caktuar arrestim 15-ditor, përkundër urdhrit për lirimin e tij më 21 maj.
Familja Hussein nuk ka zbuluar informacione mbi akuzat kundër tij dhe njoftoi se ai është kthyer në burg.
"Në mes të procesimit për lirimin e tij, gazetari i Al Jazeera Mahmoud Hussein është kthyer në burg në Egjipt në rrethana të paqarta", tha Al Jazeera në faqen e saj të internetit.
Më 23 maj, Gjykata Penale e Kajros hodhi poshtë një ankesë të parashtruar nga prokurorët kundër lirimit të Husseinit.
Hussein u arrestua në fund të vitit 2016, pasi u kthye në shtëpinë e tij në Egjipt nga Katari.
Autoritetet e kanë akuzuar atë për "pjesëmarrje në grup të jashtëligjshëm" dhe "përhapje të lajmeve të rreme që synojnë destabilizimin e vendit".
Al-Jazeera u ndalua zyrtarisht në Egjipt pas puçit ushtarak të vitit 2013 kundër Mohamed Morsit, presidentit të parë të vendit të zgjedhur në mënyrë demokratike.
