Australia shënoi ditën më të nxehtë

Australia të mërkurën regjistroi ditën e saj më të nxehtë me temperaturat deri në 41.9 gradë celsius, bëri të ditur Byroja e Meteorologjisë në vend, transmeton Anadolu Agency (AA).

Më herët, zyrtarët e motit të martën e shpallën si ditën më të nxehtë me 40.9 gradë celsius.

Vendi po lufton gjithashtu me zjarre shkatërruese.

"Australia është një vend ekstremesh dhe vendet e nxehta janë duke u bërë edhe më ekstreme", tha për AA Glen Klatovsky, nënkryetari i Lëvizjes globale të klimës "350 Australia".

"Ekzistojnë faktorë të shumtë në këtë valë të të nxehtit nga Dipoli i Oqeanit Indian dhe Indeksi i Lëkundjeve Jugore dhe të tjera", tha ai, duke shtuar se ndryshimi i klimës i zmadhon këta faktorë.

Duke adresuar shqetësimet në rritje për refugjatët si pasojë e klimës, ai tha se ka dhjetra qytete në vend ku uji po mbaron dhe qeveria po shqyrton evakuimin.

"Australia është duke u përballur me atë se çfarë do të thotë ngrohja për një gradë", tha Klatovsky.