Agjencia e OKB-së paralajmëron për "dimrin që po afrohet" në Gaza

Agjencia e OKB-së për refugjatët palestinezë (UNRWA) njoftoi se mijëra njerëz të zhvendosur me forcë në Rripin e Gazës po përpiqen të gjejnë strehim të sigurt gjatë muajve të dimrit që po afrohen, transmeton Anadolu.

Në një postim në platformën X me bazë në SHBA, UNRWA theksoi se njerëzit në Gaza po përdorin tenda primitive sepse nuk kanë mundësi të tjera dhe se ende ka një nevojë urgjente për materiale strehimi.

"Më shumë se 79.000 njerëz po përpiqen të mbijetojnë në kushte të tmerrshme në 85 strehimore të UNRWA-së në Gaza, ku situata humanitare po përkeqësohet me shpejtësi ndërsa afrohet dimri", thuhet në deklaratë.

OKB-ja ka raportuar më parë se shumë familje palestineze në Gaza, të detyruara të largohen nga shtëpitë e tyre për shkak të sulmeve izraelite dhe që jetojnë në strehimore të pajisura dobët, janë në rrezik përmbytjesh.

Zëdhënësi i Sekretarit të Përgjithshëm të OKB-së, Stephane Dujarric, deklaroi në konferencën e përditshme për shtyp të djeshme se ai mbetet i shqetësuar për ndikimin e shirave të rrëmbyeshëm mbi njerëzit e Rripit të Gazës. "Shumë familje që jetojnë në strehimore me pajisje të pamjaftueshme në Gaza janë në rrezik përmbytjesh", tha Dujarric.

Dujarric theksoi se njerëzit në Gaza janë në mënyrë të pashmangshme "jashtëzakonisht të pambrojtur" ndaj kushteve të këqija të motit dhe se OKB-ja dhe partnerët e saj po bëjnë gjithçka që munden për të "lehtësuar problemin".

Në anën tjetër, Dujarric vuri në dukje pengesat e vazhdueshme për hyrjen e ndihmës humanitare në Gaza, duke deklaruar se Izraeli vazhdon të mohojë sistematikisht hyrjen e disa furnizimeve kritike dhe ndalon aktivitetet e grupeve të rëndësishme të ndihmës, përfshirë partnerët e OKB-së.

Tendat e përdorura nga palestinezët e detyruar të largohen nga shtëpitë e tyre për shkak të sulmeve izraelite në Rripin e Gazës janë përmbytur përsëri pas shirave të rrëmbyeshëm të kohëve të fundit.

Dhjetë ditë më parë, shirat e rrëmbyeshëm në Rripin e Gazës përmbytën dhjetëra mijëra tenda të vjetra dhe të rrënuara dhe kjo situatë thelloi edhe më tej krizën humanitare të shkaktuar nga sulmet izraelite që vazhdojnë prej dy vitesh.

Raportohet se Rripi i Gazës ka nevojë për afërsisht 300.000 tenda dhe njësi të parafabrikuara jetese për të përmbushur nevojat e tij më themelore për strehim.