Shqipëri, kremtohet Dita e Nevruzit

Në Shqipëri është kremtuar me disa ceremoni dhe aktivitete Dita e Nevruzit, që shënohet si festë zyrtare, raporton Anadolu.

Ceremonia qendrore është organizuar në selinë e Kryegjyshatës Botërore Bektashiane në Tiranë, me pjesëmarrjen e qytetarëve, përfaqësuesve të institucioneve të ndryshme dhe klerikëve bektashinj.

Gjatë ceremonisë tradicionale, kryegjyshi botëror i bektashinjve, Haxhi Dede Edmond Brahimaj, përshëndeti të pranishmit, duke përcjellë urimet dhe mesazhet e tij për festën e Nevruzit.

Pjesë e ceremonisë qendrore ishte edhe programi artistik me këngë dhe valle shqiptare.

Ndërkohë, aktivitete dhe ceremoni festive janë organizuar edhe në qytete të tjera të Shqipërisë.

Me rastin e Ditës së Nevruzit, zyrtarë të lartë të Shqipërisë, politikanë dhe drejtues të institucioneve të ndryshme kanë përcjellë mesazhet e tyre të urimit.

Dita e Nevruzit në Shqipëri shënohet si festë zyrtare, ndërkohë simbolizon ditën e shpresës dhe ripërtëritjes që përkon edhe me ardhjen e stinës së pranverës.