PRISHTINË (AA) - Brenda dy ditësh, të dielën dhe të hënën, në Kosovë humbën jetën pesë persona si pasojë e vrasjeve, raporton Anadolu.

Rasti i fundit i vrasjes u shënua mbrëmjen e së hënës në Hajvali të Prishtinës.

"Sot rreth orës 22:00, është raportuar për gjuajtje me armë zjarri, në Hajvali, ku është vrarë një person. Vdekja e viktimës mashkull është konstatuar nga ekipi mjekësor në Qendrën Klinike Universitare të Kosovës (QKUK)", ka thënë dje zëdhënësja e Policisë, Flora Ahmeti.

Ajo ka treguar se policia i ka nisur hetimet për zbardhjen e rastit, dhe është në kërkim të personit të dyshuar, i cili tashmë është identifikuar.

Të dielën Kosova u trondit pasi u shënuan tre viktima në qytetin e Gjilanit. I dyshuari për kryerjen e veprës bashkë me dy djemtë e tij ndodhen ende në arrati.

Kjo ngjarje tragjike ishte temë nacionale, ku ministri në detyrë i Punëve të Brendshme, Xhelal Sveçla, kërkoi hetim në Polici, ndërkaq ministrja në detyrë e Drejtësisë, Albulena Haxhiu, kërkoi që gjyqtarët e prokurorët në rastin e Mefail Shkodrës të iu vihet masa disiplinore, për shkak se ata kishin qenë në paraburgim, por ishin liruar edhe pse ishin subjekt i hetimeve për vepra të rënda penale si fajdeja dhe detyrimi.

"Lirimi i tyre përbën një neglizhencë të rëndë institucionale dhe ka prodhuar pasoja tragjike e të pariparueshme", tha Haxhiu.

Inspektorati i Policisë ka treguar se me rekomandimin e tyre katër zyrtarë të policisë për këtë rast, janë suspenduar.

- Një vrasje tjetër ndodhi mbrëmjen e së dielës në Prizren

Një vrasje tjetër ndodhi mbrëmjen e së dielës në qytetin e Prizrenit, ku një person vdiq si pasojë e therjes me thikë.

Prokuroria Themelore në Prizren - Departamenti për Krime të Rënda, njoftoi se për shkak të lëndimeve të rënda, i njëjti është dërguar për trajtim të mëtutjeshëm në QKUK- në Prishtinë, mirëpo për shkak të plagëve në pjesën e gjoksit, viktima ka ndërruar jetë.

Ndërkaq, të hënën një aksident ku u përfshin gjashtë vetura, për pasojë la të vdekur një person dhe dy të tjerë në gjendje të rëndë.

Nga QKUK bënë të ditur se numri i të lënduarve në këtë rast ishte 11, megjithëse pjesa më e madhe janë liruar pas trajtimit mjekësor.

Pas këtyre rasteve, shumë qytetarë në Kosovë, kërkuan nga shteti që të shtojë masat e sigurisë në vend, për shkak të numrit të madh të vrasjeve dhe aksidenteve.