Шефот на турската дипломатија Фидан: „Убивајќи го Ханије, Израел го уби и мирот“

ИСТАНБУЛ (АА) - Министерот за надворешни работи на Туркије, Хакан Фидан, вчера изјави дека Израел со убивањето на политичкиот лидер на Хамас, Исмаил Ханије, го убил и мирот, јавува Анадолу.

„Изразувам сочувство до неговото семејство, палестинската нација и исламскиот свет. И не треба да се заборави дека убивајќи го него, го убија и мирот“, изјави министерот Фидан гостувајќи во програма во живо.

Фидан истакна дека израелскиот премиер ја „зел Америка за заложник“.

„Нетанјаху е свесен за тоа. Ја зеде Америка за заложник. Доколку влезе во војна во Либан, САД ќе немаат избор освен да се вклучат во судирот за да го поддржат“, додаде шефот на турската дипломатија.

Лидерот на Политичкото биро на Хамас, Исмаил Ханије, е убиен во иранската престолнина Техеран вчера наутро. Хамас и Иран го обвинија Израел за убиството, но Тел Авив сѐ уште ниту го потврди тоа ниту ја негираше својата вмешаност.

Ханије, кој престојуваше во Техеран за да присуствува на инаугурацијата на иранскиот претседател Масуд Пезешкијан, убиен е во воздушен напад врз резиденцијата во која се наоѓал.