Faruk Zorlu
21 Јануари 2023•Ажурирај: 22 Јануари 2023
АНКАРА (АА) – Турскиот министер за надворешни работи, Мевлут Чавушоглу, критикувајќи ја Шведска за давањето дозвола за планирано палење на Куранот, рече дека расизмот и делата од омраза не се сметаат за слобода на размислување, јавува Агенција Анадолија (АА).
„И покрај сите наши предупредувања, таквата дозвола за жал е дадена на ова лице. Никој не може да го нарече ова слобода на изразување и слобода на размислување“, изјави Чавушоглу за новинарите во Анталија.
Изјавите на Чавушоглу уследија откако Расмус Палудан, лидерот на данската екстремно десничарска партија Страм Курс (Цврста линија), доби дозвола да го запали Куранот денес пред турската Амбасада во Стокхолм.
„Денес тие не дозволуваат палење на друга книга, но кога станува збор за Куранот, светата книга на исламот и непријателството кон исламот, тие веднаш го нарекуваат тоа слобода на изразување и слобода на размислување“, рече тој.
„Според шведскиот закон, одлуките на Советот на Европа и одлуките на Европскиот суд за човекови права, делата од омраза и расизмот не се слобода на размислување или слобода на изразување“, додаде Чавушоглу.
„Пакосниот чин наводно се планира да се случи околу 16-17 часот по турско време“, рече тој, и изрази надеж дека шведските власти дотогаш ќе преземат мерки за да го спречат тоа.
„Бидејќи ова ќе создаде бес низ целиот свет на ист начин. Тоа би било пакосно, расистичко и дело од омраза“, рече турскиот министер.
Шведскиот министер за надворешни работи, Тобијас Билстром, рече дека е загрижен поради тоа што со демонстрацијата се ризикува дополнително одложување на ратификацијата на шведската кандидатура за НАТО од страна на Туркије. Но, тој рече дека би било „многу несоодветно“ да повика да не му се дозволи на одредено лице да демонстрира.
Поради тоа, Анкара ја откажа претстојната посета на шведскиот министер за одбрана Пал Јонсон на Туркије.
Турското Министерство за надворешни работи вчера го свика шведскиот амбасадор во Анкара, Стефан Херстром, кому му беше кажано дека Туркије „остро го осудува овој провокативен чин, кој очигледно претставува кривично дело од омраза, дека ставот на Шведска е неприфатлив, дека Анкара очекува чинот да не биде дозволен, како и дека навредите на светите вредности не можат да се бранат под превезот на демократските права“.
Туркије ја предупреди Шведска дека дозволувањето пропагандни активности што круговите поврзани со терористичката ПКК ги подготвуваа да ги реализираат во Стокхолм денес е „јасно кршење“ на трипартитниот договор, изјавија турски дипломатски извори.
Минатата недела, Туркије ја повика Шведска да преземе чекори против терористичките организации по демонстрациите во Стокхолм, каде приврзаниците на терористичката организација ПКК обесија кукла со ликот на турскиот претседател Реџеп Таип Ердоган за нозете, а потоа објавија снимки од провокацијата на социјалните мрежи заедно со закани против Туркије и Ердоган.
Шведска и Финска официјално поднесоа барање за влез во НАТО во мај, напуштајќи го повеќедецениското воено неврзување, одлука поттикната од руската војна против Украина што започна на 24 февруари.
Но, Туркије, членка на НАТО повеќе од 70 години, изрази приговори, обвинувајќи ги двете земји за толерирање и поддржување на терористичките организации, како што се ПКК и ФЕТО.
Во јуни, Туркије и двете нордиски земји потпишаа меморандум на самитот на НАТО за решавање на легитимните безбедносни грижи на Анкара, со што се отвори патот за нивното евентуално членство во Алијансата.
