Diyar Güldoğan
07 Август 2023•Ажурирај: 08 Август 2023
АНКАРА (АА) – Туркије се подготвува да ја прослави 100-годишнината од прогласувањето на Републиката, а министерот за надворешни работи Хакан Фидан рече дека визијата на земјата е да биде меѓу светските актери во изградбата на системот, јавува Анадолу.
„Наша визија е да ја направиме Туркије еден од актерите во градењето на системот во 'Векот на Туркије'. Оваа голема цел ќе ја достигнеме со предвидување и обликување на промените“, рече Фидан во обраќањето пред турските амбасадори.
Турските амбасадори се собраа во главниот град Анкара на 14-та Амбасадорска конференција за да разговараат за регионалните и меѓународните случувања, глобалните трендови и актуелните предизвици и можности.
„Ќе работиме со другите земји за да воспоставиме ефикасен и инклузивен меѓународен систем што го опфаќа човештвото, ги елиминира глобалните неправди, ги решава економските нееднаквости и создава мир, безбедност, стабилност и просперитет“, рече Фидан.
Тој истакна дека Туркије напредува со сигурни чекори со свесност дека големите промени бараат стратегиско трпение и силна волја.
„Со спроведувањето на овие чекори ќе постапуваме во согласност со четирите основни стратегиски цели. Тоа се воспоставување мир и безбедност во нашиот регион, воспоставување на нашите надворешни односи на структурна основа, развој на средина на просперитет и унапредување на нашите глобални цели“, рече Фидан.
Шефот на турската дипломатија истакна дека најголема закана за безбедноста, мирот и стабилноста во регионот се терористичките организации и другите прокси групи.
„Заедно со сите наши релевантни институции нема да дозволиме терористичките организации и силите зад нив да ги отворат очите во нашата земја и во нашиот регион, без разлика дали овие терористички организации се нарекуваат ФЕТО, ПКК/ЈПГ или ДЕАШ. Нема да им оставиме простор да дејствуваат, нема да дозволиме да здивнат“, изјави Фидан.
Тој рече дека Туркије ќе продолжи да се бори против терористите со зајакнување на своите воени, разузнавачки и технолошки капацитети дома, истовремено обезбедувајќи ефикасна соработка со пријателите во странство.
