Турско МНР: „Остро ја осудуваме одлуката на Бахреин за воспоставување дипломатски односи со Израел“

АНКАРА (АА) - Министерството за надворешни работи на Турција изрази загриженост и остро ја осуди одлуката на Бахреин за воспоставување дипломатски односи со Израел, што е спротивно на обврските во рамките на Организацијата за исламска соработка, пренесува Агенција Анадолија (АА).

Во соопштението се истакнува дека овој чекор ќе влијае на одбраната на палестинската кауза и се додава:

„Ќе го охрабри Израел да ги продолжи своите нелегитимни практики против Палестина и неговите обиди трајно да ги окупира палестинските територии.“

Исто така во соопштението се потенцира дека единствениот начин да се воспостави мир и стабилност на Блискиот Исток е преку фер и сеопфатно решение на палестинското прашање во рамките на меѓународното право и резолуциите на Обединетите нации.

„Притисокот и принудата на актерите надвор од регионот, неодговорните отстапки поради тесни интереси, не можат да ја елиминираат или пак, да ја заменат оваа реалност“, се нагласува во соопштението на турското МНР.