Турскиот министер Фидан: Коридорот Лачин е територија на Азербејџан

АНКАРА (АА) - Министерот за надворешни работи на Туркије, Хакан Фидан, денес изјави дека коридорот Лачин, единствената копнена маршрута што ѝ дава пристап на Ерменија до Карабах, е територија на Азербејџан и дека Баку може да преземе какви било мерки, јавува Анадолу.

„Коридорот Лачин е територија на Азербејџан. Затоа Азербејџан презема секакви мерки што смета дека се неопходни. Преземањето (мерки), исто така, е едно од неговите најголеми суверени права.“

„Можни се и медицински премини. Обезбедени се и други маршрути што се погодни за обемен транспорт на материјали. Кога ќе ги погледнеме сите овие евалуации, сметаме дека нема оправдување да се критикува Азербејџан по ова прашање“, рече Фидан на заедничката прес-конференција со неговиот азербејџански колега Џејхун Бајрамов во главниот град Анкара.

Азербејџан ги повика земјите и меѓународните организации што дадоа антиазербејџански изјави да ги почитуваат неговиот суверенитет и територијален интегритет, особено во однос на случувањата во Карабах и коридорот Лачин.

И покрај тековните разговори за мировен договор, тензиите меѓу Баку и Ереван се зголемија во последните месеци за коридорот Лачин, како и за воспоставувањето граничен пункт од страна на Азербејџан на коридорот.

Фидан истакна дека е „исклучително важно“ мировните преговори меѓу Азербејџан и Ерменија да дојдат до заклучок.

Турскиот министер додаде дека договори меѓу Азербејџан и Ерменија треба да се потпишат наскоро и додаде: „Ова претставува одлична можност за другите земји во регионот.“

Во однос на клучниот коридор Зангезур во Јужен Кавказ, Фидан рече дека неговото отворање е витално.

„Патот до регионална стабилност е преку сеопфатен мировен договор. За ова од големо значење е отворањето на коридорот Зангезур“, додаде тој.

Регионот Зангезур првично беше дел од Азербејџан, а Советите ѝ го дадоа на Ерменија во 1920-тите години, оставајќи го Азербејџан без директна копнена поврзаност до нејзината ексклава Нахчиван.

По 44-дневната војна со Ерменија есента 2020 година, Азербејџан се фокусира на планираната конективност, вклучително автопатишта и 43-километарската железничката пруга низ коридорот.

Коридорот ќе биде близу до ерменската границата со Иран, што наводно ќе го загрижи Техеран дека проектот може да ја прекине неговата граница со Ереван.