Ali Murat Alhas
12 Јуни 2022•Ажурирај: 13 Јуни 2022
АНКАРА (АА) – По појавата на ново видео кое е спротивно на полициските тврдења, Туркије изврши притисок врз Франција да ја објасни смртта на Турчинот во полициски притвор минатата година, јавува Агенција Анадолија (АА).
Мертер Кескин (35) почина помеѓу 12 и 13 јануари во источниот француски град Селестат, а неодамна беа обелоденети снимки на кои се гледа како полицајците врз Кескин, кој е врзан со лисици, ја изведуваат техниката на притискање на дишните патишта кон тлото.
Портпаролот на турското Министерство за надворешни работи, Танжу Билгич, рече дека турската страна контактирала со француските правосудни власти и дека во тек е истрага за случајот.
„Она што е прикажано на новодобиените снимки не е во согласност со владеењето на правото“, рече тој.
„Во овој контекст, очекуваме што поскоро да се расветлат причините за смртта на нашиот граѓанин“, наведе Билгич.
„Турција ќе продолжи да ги следи случувањата“, додаде тој.
На новата снимка што неодамна ја доби Агенција Анадолија (АА), може да се види како полицајци го внесуваат Кескин во станицата, кој мирно чекори со рацете врзани со лисици зад грб.
Видеото е во спротивност со тврдењата на полицијата дека Кескин не соработувал и не бил мирен при притворањето.
Потоа се гледа како Кескин лежи неподвижно на клупа во ќелијата. Полицаец проверува дали дише, а потоа му ја крева раката и ја пушта.
По неколку минути, двајца полицајци го подигнуваат од клупата и го ставаат на подот, а Кескин сè уште не дава знаци на живот.
Потоа му ја тргаат кошулата и го удираат двапати по лицето пред да започнат со компресија на градите.
На видеото се гледа како полицајците губат околу две минути откако првично сфаќаат дека Кескин престанал да дише, пред да се обидат да го реанимираат.
