Туркије: Неприфатливи се неоснованите обвинувања на портпаролот на германското МНР

АНКАРА (АА) - Портпаролот на турското Министерство за надворешни работи, Танжу Билгич, изјави дека е неприфатливо портпаролот на германското Министерство за надворешни работи да изнесува неосновани обвинувања против Туркије, иако Грција го наруши турскиот воздушен простор и лета над копното на Туркије, јавува Агенција Анадолија (АА).

Говорејќи на прес-конференција вчера, портпаролот на германското Министерство за надворешни работи, Кристијан Вагнер, рече дека неодамнешните изјави на турските власти „не помагаат кон конструктивниот дијалог и стабилноста во регионот“, додека „особено агресивната реторика, како и турското кршење на грчкиот воздушен простор, даваат причина за загриженост“.

Реагирајќи на оваа изјава, Билгич упати соопштение во кое наведува дека неоснованите обвинувања на германскиот портпарол се неприфатливи, додавајќи дека токму Грција го нарушила турскиот воздушен простор и прелетала над Туркије.

„Би сакале да го потсетиме германскиот портпарол дека и покрај повиците за билатерални состаноци и состаноци за градење доверба од страна на НАТО, Туркије не е таа која не одговори една година и соопшти дека ги прекинува овие состаноци со користење на неодамнешните тензии во Егејот како изговор“, рече Билгич.

Министерството ја повика Германија, која тврди дека вложува напори во дијалог и деескалација, „да не зазема страна во спорот меѓу двата сојузници, да не биде инструмент за беззаконие на другите држави и да не дава пристрасни коментари за подрачјата и прашањата во кои нема надлежност или одговорност“.