Ердоган упати порака со сочувство за смртта на пилотот во падот на турскиот противпожарен авион во Хрватска

ИСТАНБУЛ (АА) - Турскиот претседател Реџеп Таип Ердоган упати порака со сочувство за смртта на пилотот во падот на турскиот противпожарен авион во Хрватска.

„Вечерва добивме вест дека противпожарен авион на нашата Генерална дирекција за шумарство, за жал, се урнал во Хрватска. Длабоко сме ужалени од оваа трагична несреќа во која загина еден од нашите пилоти. Се молам за божја милост и изразувам сочувство до неговото семејство, нашата земја и нашиот народ“, рече Ердоган во објавата на турската социјална мрежа „NSosyal“.

Претходно турскиот министер за земјоделство и шумарство Ибрахим Јумакли потврди дека остатоците од исчезнатиот авион се пронајдени во близина на Сењ и дека во несреќата загинал пилотот.

Според турското Министерство за земјоделство и шумарство, авионот бил дел од мисија за планирано одржување во Загреб. Двата авиона AT-802 полетале од Чанаккале на 12 ноември, но поради лоши временски услови, преноќиле во Риека.

За Загреб полетале денес, но поради влошувањето на временските услови започнале со враќање, при што едниот авион безбедно слетал во Риека, а радиоконтактот со другиот бил изгубен пред да падне на подрачјето на Криви Пут кај Сењ.

Владата на Хрватска упати порака со сочувство до Турција откако беше потврдено дека пилотот загинал при падот на турскиот противпожарен авион кај Сењ.

„Потпретседателот на Владата и министер за внатрешни работи Давор Божиновиќ разговараше со турскиот министер за внатрешни работи Али Јерликаја и му изрази сочувство за трагичната несреќа“, се вели во објавата на Владата на социјалната мрежа на американската компанија X.