Ердоган: „Турција сака да види конкретни чекори во поглед на својата безбедност, а не празни дипломатски фрази“

КОЏАЕЛИ (АА) - Турскиот претседател Реџеп Таип Ердоган истакна дека Турција ја плаќа цената за членството во НАТО и дека како таква бара конкретни чекори во врска со прашањата од национална безбедност, а не празни дипломатски фрази, јавува Агенција Анадолија (АА).

Ердоган присуствуваше на церемонијата на запловување на подморницата „Хизир реис“ во командата на бродоградилиштето „Голџук“ и почетокот на производството на подморницата „Селман реис“.

Ердоган најави дека подморницата од домашно производство во Турција ќе биде завршена во наредните пет или шест години.

Турскиот претседател понатаму кажа дека Турција е на првата линија на фронтот во борбата против тероризмот и борбата против нелегалната миграција и дека го спречила планот за формирање терористички коридор по должината на нејзините јужни граници.

Тој остро ги осуди и лидерите на западните земји кои ги поддржуваа терористичките организации ПКК и ФЕТО и приредуваа свечени приеми за терористичките водачи.

„Оние кои денеска го фалат придонесот на Турција за безбедноста на НАТО немилосрдно ја критикуваа нашата земја поради чекорите кои до вчера ги преземавме во Либија и Сирија. Турција не ја доби поддршката што ја очекуваше од своите сојузници, ниту во своите легитимни прекугранични операции, ниту во својата 40-годишна борба против тероризмот. Нашата земја често била изложена на прикриени и отворени санкции, ембарго, закани, притисоци и уцени. Двојниот стандард е случај кој добро го знаеме и кој сме го искусиле на сопствена кожа“, нагласи Ердоган.

Истакнувајќи дека виталната улога што ја има Турција во НАТО и другите меѓународни организации е сосема јасна, Ердоган кажа дека некои земји сè уште го разгледуваат укинувањето на санкциите, вклучително и Шведска.

„Сакаме да видиме конкретни чекори, а не отворени дипломатски изјави за нашата национална безбедност, особено поради тоа што ние сме земја која ја плаќа цената за НАТО. Веруваме дека политиката на проширување која не обрнува внимание на темелните безбедносни прашања нема да направи ништо добро за нас или НАТО“, порача Ердоган.

Турскиот претседател исто така кажа дека Турција од сите тие предизвици и двојни стандарди израснала во земја која акцентот го ставила на домашното производство во одбранбената индустрија и дошла до 70 проценти такво производство, а од неодамна нејзината зависност од увозот во тој сектор изнесувала 80 отсто.

„Нашата земја во моментот е меѓу десетте земји во светот кои можат национално да проектираат, да градат и одржуваат воени бродови. Сите овие активности се реализираат со сложна работа на нашата Дирекција за одбранбена индустрија, нашата војска, бродоградилишта, универзитети и приватен сектор, кои ги зајакнуваме со нашата лична поддршка. Се надевам дека ќе ја зајакнеме оваа синергија и ќе продолжиме да создаваме историја во одбранбената индустрија работејќи во целосно јавно-приватна хармонија. Нема да застанеме додека Турција не ја направиме една од најсилните земји во светот во оваа област“, истакна Ердоган.