Sefa Mutlu, Berk Özkan
03 Септември 2021•Ажурирај: 04 Септември 2021
ИСТАНБУЛ (АА) - Турскиот претседател Реџеп Таип Ердоган изјави дека неговата земја од буџетот за образование издвојува повеќе отколку за која било друга институција и дека во изминатиот период значително се подобрени личните права и стандардот за живот на наставниот кадар, јавува Агенција Анадолија (АА).
„Одлучни сме училиштата да ги држиме отворени и на учениците да им дадеме најдобро образование. Преземајќи ги сите неопходни мерки, в понеделник ќе ги вратиме децата во училиштата“, изјави Ердоган на церемонијата во истанбулскиот Конгресен центар „Халич“.
Ердоган упати честитки и им посака успех во работата на 20.000 наставници кои ќе бидат распоредени, со кои бројот на наставници ќе достигне 1 милион и 137 илјади.
Тој потсети дека во 2002 година Турција имала половина милион наставници, а дека со 700.000 нови е надминат проблемот со недостиг на наставниот кадар потребен за спроведување на квалитетна образовна програма.
„Просекот на бројот на ученици во одделенијата го намаливме на 22 и по тој просек во основното образование сме речиси на ниво на Германија и САД, а значително пред Велика Британија, Франција и Австрија. Исто така, го достигнавме просекот на земјите на Организацијата за економска соработка и развој (OECD) и со 15 ученици во основните и 13 ученици во средните училишта на еден наставник. Нашиот обучен кадар, кој располага со сите видови знаења и вештини потребни за ова време, го гледаме како локомотива на економијата, општеството и демократијата“, изјави Ердоган.
Ердоган исто така изјави дека Турција е земја која најмногу ги зголемила платите на наставниците во изминатите две децении во Европа и додаде дека Турција е во предност по тоа што наставниците имаат најмал број на задолжителни часови неделно.
„Од Турција направивме држава која во голема мера ги отстрани инфраструктурните недостатоци во областа на образованието, како во секое друго подрачје“, истакна Ердоган.
