Merve Gül Aydoğan Ağlarcı
03 Октомври 2020•Ажурирај: 04 Октомври 2020
ИСТАНБУЛ (АА) - Претседателот на Република Турција, Реџеп Таип Ердоган, порача дека и покрај сите предизвици со кои се соочува, Турција ќе продолжи со напредокот и изградбата на големи инфраструктурни проекти, како и претходните години, јавува Агенција Анадолија (AA).
„Годишната економска корист од овој проект во областа на наводнување за нашата земја е 350 милиони лири, а неговиот придонес кон производството на енергија е 80 милиони лири“, рече Ердоган преку видеолинк на свеченото отворање на браната „Рејханли“ во Хатај и на неколку други инфраструктурни проекти.
„Одлучни сме на нашите млади генерации да им оставиме голема, силна и богата Турција“, рече Ердоган.
Нагласи, исто така, дека Турција одлучно ќе ја продолжи борбата против сите терористички организации што ѝ се закануваат на земјата.
„Терористичките зони кои сè уште постојат во Сирија ќе бидат расчистени како што ни е ветено или тоа ќе го сториме сами. Продолжиме со активно дејствување на терен сè додека не се воспостави стабилност на нашата јужна граница. Никогаш нема да преземеме ниеден чекор што ќе доведе до нова хуманитарна трагедија во Идлиб“, рече Ердоган.
Истакна дека Турција, додека го уништуваше терористичкиот коридор по должината на нејзините граници, јасно покажа дека секогаш ќе биде покрај своите сириски браќа.
„Знаеме дека Турција, почнувајќи од Хатај па натаму, нема да живее во мир и безбедност сè додека во Сирија не се воспостави мир и безбедност. Исто како и на Балканот, Кавказ и Медитеранот, ќе продолжиме да бидеме активни на теренот долж нашата голема јужна граница сè додека не биде воспоставена стабилност“, рече Ердоган.
Порача исто така дека никогаш нема да дозволат никому да го спречи напредокот и развојот на Турција.
„Нека не ни замеруваат, но и понатаму одлучно ќе ги попречуваме оние што се непријателски расположени кон нашата земја и нашиот народ. Оние кои не им се спротивставуваат на терористичките организации и силите што ги користат терористите и што го занемаруваат секој принцип и право кога станува збор за Турција, не нè оттргнаа од нашиот пат, ниту пак, ќе успеат во тоа“, рече турскиот претседател.
Нагласи дека огромното единство на турскиот народ и големите инфраструктурни проекти ѝ помогнале на земјата да се соочи со сите предизвици и проблеми.
„Турција цврсто стои на своите нозе, иако се наоѓа во самото средиште на светските кризни жаришта, првенствено заблагодарувајќи се на силата на единството и солидарноста и на развиената инфраструктура на сите полиња. Нашата цел е земјата во политичка и економска смисла да ја донесеме до нивото на најмоќните држави во светот“, рече Ердоган.
