АНКАРА
Турскиот претседател Реџеп Таип Ердоган изјави дека терористите на ФЕТО за време на обидот за државен удар на 15 јули 2016 година во потполност би го срушиле турското Големо народно собрание (ТБММ), доколку биле доволни силни за тоа, јавува Агенција Анадолија (АА).
„Да беа доволно силни, бидете сигурни дека не би се двоумеле да го убијат претседателот, премиерот и сите избрани официјални претставници на оваа земја“, изјави Ердоган на собирот кој во комлексот на турскиот Парламент се одржува по повод четвртата годишнина од неуспешниот обид за државен удар во Турција, односно по повод Денот на демократијата и националното единство кој се одбележува во таа земја.
Тој порача дека предавниците на ФЕТО во ноќта на 15 јули не го бомбардирале случајно Големото народно собрание на Турција и дека тоа не бил обичен обид за пуч, нагласувајќи дека зад тоа стојат големи интереси и пресметки.
„15 јули е последната алка во синџирот на борбата што ја водевме со векови, да се биде или да не се биде, во областите каде што живееме“, рече Ердоган, и додаде дека е многу важно да се избегнат настаните што се случија тој ден.
„Кој и да се обиде да го омаловажи, карикира и да го направи 15 јули безвреден, знајте дека се обидува да го прикрие длабокото историско значење на тој датум“, истакна претседателот на Република Турција, и додаде:
„Откако на 15 јули со голема брзина се ликвидирани и дешифрирани ќелиите на ФЕТО, на Турција на сите полиња ѝ се отворија нови видици и се започна со голем број на нови потфати. Вооружените сили на Турција започнаа да вршат операции, кои долга низа години не успевавме да ги почнеме. Секаде, од администрацијата до деловниот свет, нашите граѓани со самодоверба гледаат во иднината“, изјави Ердоган.
Тој нагласи дека неговата земја ќе продолжи цврсто да ја брани демократијата и својата независност и во иднина.
„Заради наш сопствен просперитет и интерес, во инает на оние кои се обидоа да ја фрлат Турција во оган, ќе продолжиме да ја браниме нашата демократија и нашата независност заедно со нашиот народ како што тоа го направивме и во ноќта на 15 јули“, изјави Ердоган, и додаде:
„Да беа доволно силни, бидете сигурни дека би славеле оние кои сакаат турскиот народ да го избришат и избркаат од Анадолија и Европа и да ги избришат сите траги од овие подрачја. Но со божја помош и отпорот на нашиот народ, нивната сила не беше доволна и обидот за пуч не успеа“, изјави Ердоган.
Тој напомена дека понекогаш еден голем херој може да ја смени судбината на огромен народ.
„Токму на 15 јули, милиони херои се појавија низ нашата земја и така заедно ја одредивме иднината на целиот народ“, изјави турскиот претседател.
Со низа пригодни настани во Турција денеска ќе биде одбележана четвртата годишнина од обидот за државен удар за време на кој терористичката организација ФЕТО се обиде да го сруши демократскиот поредок во таа земја и тоа со посредство на терористите кои претходно беа инфилтрирани во вооружените сили на таа земја, а кои врз сопствениот народ отворија оган од оружје кое народот и државата им го доверија.
ФЕТО и нејзините членови кои беа инфилтрирани во војската, полицијата и другите институции, за време на крвавиот обид за државен удар на 15 јули 2016 година го покажаа своето вистинско терористичко лице и намера, убивајќи најмалку 251 лице.
Обидот за државен удар е осуетен и спречен откако народот на Турција на повик на претседателот Реџеп Таип Ердоган храбро излезе на улиците и плоштадите и ја одбрани демократијата и татковината од пучистите.
