Zehra Nur Düz, Esra Taşkın
09 Декември 2023•Ажурирај: 11 Декември 2023
ИСТАНБУЛ (АА) - Турскиот претседател Реџеп Таип Ердоган денес го повтори својот повик за реформа на Советот за безбедност на Обединетите нации (СБОН), каде што вчера Соединетите Американски Држави (САД) ставија вето на резолуцијата со која се повикува на итен хуманитарен прекин на огнот во Газа, јавува Анадолу.
„Поради ветото на САД, не беше донесена одлуката. Од суштинско значење е Советот за безбедност на ОН да се реформира“, порача Ердоган во своето обраќање на настан во Истанбул по повод Светскиот ден на човековите права.
„Ги изгубивме надежта и очекувањата од Советот за безбедност на ОН“, рече тој. „Од 7 октомври, Советот за безбедност на ОН, чија мисија е да воспоставува глобален мир, се претвори во заштитник на Израел“.
Израел ја продолжи својата воена офанзива врз Појасот Газа на 1 декември, по завршувањето на еднонеделната хуманитарна пауза со палестинската група на отпорот Хамас.
Околу 17.500 Палестинци загинаа во опколената енклава од 7 октомври во израелските воздушни и копнени напади.
Турскиот претседател истакна дека израелската влада, поткрепена со целосна поддршка од Западот, врши злосторства и масакри во Газа кои го срамат човештвото како целина.
„Касапите на Газа“ мора да одговараат за злосторства против човештвото, рече Ердоган, додавајќи дека тие „порано или подоцна“ ќе одговараат.
Тој рече дека е можен праведен свет, но не со САД бидејќи тие се на страната на Израел.
Турскиот претседател истакна дека Универзалната декларација за човекови права на Обединетите нации блатантно се прекршува во Газа и на окупираните палестински територии.
