Ердоган: „Никакви закани со санкции нема да ја одвратат Турција од нејзината борба за правда“

АНКАРА

Турскиот претседател, Реџеп Таип Ердоган, изјави дека никакви прикриени, ниту отворени закани со санкции, не можат да ја одвратат Турција од нејзината борба за вистината и легитимните интереси на нејзиниот народ, јавува Anadolu Agency (AA).

Дирекцијата за комуникации при Уредот на турскиот претседател ја објави пораката на Ердоган по повод 96-годишнината од потпишувањето на Мировниот договор од Лозана, со кој Република Турција ги доби денешните граници.

Станува збор за мировен договор потпишан меѓу Турција и силите на Антантата, со кој беа поставени темелите и границите на модерна Република Турција, а Ердоган во пораката истакна дека истовремено се одбележува и јубилејната 100-та годишнина од почетокот на борбата за независност на таа земја.

„Лозанскиот договор е документ за независност на Турција, што е извојувана со борбата против најсилните војски на светот. Токму како и пред 100 години, Турција и денес е способна и одлучна да ја брани својата независност, опстанок, мир и безбедност на своите граѓани“, порача Ердоган.

Ердоган, исто така, порача дека Турција со последните потези и активности во Источен Медитеран и на северниот дел на Сирија јасно ја покажала својата определеност и одлучност во борбата за правата и интересите на својот народ и кипарските Турци.

„Никакви прикриени, ниту отворени закани со санкции, нема да ја одвратат Турција од нејзината борба за правда“, порача Ердоган и оддаде чест на основачот на Република Турција, Мустафа Кемал Ататурк, и на сите шехиди и борци за турска независност.