Mesut Varol
29 Декември 2021•Ажурирај: 30 Декември 2021
ВАН
Турските безбедносни сили оваа година спречија повеќе од 120.000 нерегуларни мигранти да влезат во земјата од границата со Иран, според билансот на официјалните податоци од 2021 година, јавува Агенција Анадолија (АА).
За време на операциите оваа година, вкупно беа уапсени 1.904 лица осомничени за криумчарење мигранти, а 880 возила и пет брода користени во криумчарење на мигранти се запленети.
Иста така, 15.000 нерегуларни мигранти се уапсени на источната погранична покраина Ван.
Гувернерот на Ван, Мехмет Емин Билмез, за АА рече дека ѕид од 64 километри се гради долж турско-иранската граница за да се спречат илегални премини. „Поставувањето на заштитниот ѕид од 40 километри е завршено“, рече тој, додавајќи дека остатокот ќе биде завршен напролет.
„Исто така, долж границата е ископан ров од 235 километри, кој е 4 метри длабок и 4 метри широк“, додаде Билмез.
Истакнувајќи ги напорите на безбедносните сили за да ги спречат илегалните премини, како и криумчарењето и инфилтрацијата на терористите кои ги користат источните граници на земјата, тој рече дека границата се одржува под постојан надзор преку патроли на оклопни возила, заедно со беспилотни летала, термални камери и оптички кули.
„Згора на тоа, во регионот беа изградени вкупно 103 оптички кули, вклучувајќи 58 кули за набљудување и 45 кули за комуникација. Некои се активирани“, рече тој.
Турција е клучна транзитна точка за нерегуларните мигранти, кои сакаат да преминат во Европа да започнат нов живот, особено оние кои бегаат од војна и прогон.
Турција, која веќе прими 4 милиони бегалци, повеќе од која било друга држава во светот, презема нови мерки на нејзините граници за да спречи нов бран на мигранти.
