Fahri Aksüt
21 Јуни 2020•Ажурирај: 22 Јуни 2020
АНКАРА (АА) - Шефот на Кабинетот за комуникации при Претседателството на Република Турција, Фахретин Алтун, изјави дека Турција и Европската Унија (ЕУ) досега имале блиска соработка во многу области, додавајќи дека истото можат да го сторат и во борбата против антимуслиманските расистички движења, јавува Агенција Анадолија (АА).
Во Анкара преку интернет е претставен Европскиот извештај за исламофобија за 2019 година, а Алтун во обраќањето истакна дека целта на извештајот не е да се обвини некој, туку целта е повикување на отворен и искрен дијалог меѓу пријателите.
Извештајот го подготви Фондацијата за политички, економски и општествени истражувања (SETA) со седиште во Анкара.
Алтун истакна дека извештајот им овозможува на луѓето низ светот темелно да го следат развојот на антимуслиманскиот расизам во Европа.
Нагласи дека антимуслиманскиот расизам не е само европски проблем, и дека муслиманите се или убивани или повредувани во светот како дел од напорите за систематско раселување и заплашување.
Тој го привлече вниманието на фактот дека исламофобијата во Европа секојдневно дополнително се влошува и рече дека во Европа е забележан пораст на нападите врз муслиманите, џамиите и центрите на исламските заедници.
„Според тоа, борбата против исламофобијата треба да започне токму во Европа“, рече тој.
Алтун го критикуваше и пристапот на некои Европејци, нагласувајќи дека земјите во Европа, интелектуалците и носителите на одлуки мора да престанат да го доживуваат исламот како безбедносна закана, а муслиманите како потенцијални криминалци.
Порача дека европските лидери не треба да го прифаќаат антимуслиманскиот расизам и дека не треба да ги исполнуваат барањата на луѓето од екстремната десница.
