ТИРАНА (АА) - Албанската фудбалска федерација е казнета и наредено ѝ е следниот натпревар да го игра со најмалку 20 проценти од капацитетот на стадионот затворен за публиката, поради однесувањето на навивачите за натпреварот Албанија-Србија што се одигра на 7 јуни, пренесува Анадолу.

Во соопштението на Албанската фудбалска федерација се наведува дека федерацијата официјално е известена од ФИФА за дисциплинската одлука по натпреварот Албанија-Србија, одржан на 7 јуни 2025 година на стадионот „Ер Албанија“ во Тирана, како дел од квалификациските натпревари за Светското првенство во 2026 година.

„Според одлуката, Албанската фудбалска федерација е казнета со парична казна од 161.500 швајцарски франци и со обврска следниот домашен натпревар против Латвија да се игра со најмалку 20 проценти од капацитетот на стадионот затворени за публиката, поради повеќекратното несоодветно и дискриминациско однесување на некои албански навивачи (песни со дискриминациска содржина, фрлање предмети, палење огномет, користење гестови или пораки несоодветни за спортски настан, како и прекини за време на националните химни)“, се наведува во соопштението.

Според Албанската фудбалска федерација, оваа одлука е сериозна казна за целата фудбалска заедница и не само што ѝ штети на федерацијата туку, пред сè, на албанската репрезентација. „Албанската фудбалска федерација ги повикува сите навивачи на националниот тим да избегнуваат каква било акција што би можела да му наштети на нашиот тим, да ги почитуваат меѓународните правила и да придонесат за достоинствена атмосфера во поддршка на Албанија“, се наведува, меѓу другото, во соопштението.

Во квалификациските натпревари за Светското првенство во 2026 година Албанија е во групата К, заедно со Англија, Србија, Латвија и Андора.

Следниот натпревар во овие квалификации Албанија ќе го игра на 9 септември против Латвија во Тирана.