„Ауди“ ќе се приклучи на Формула 1 од 2026 година

АНКАРА (АА) - Германскиот производител „Ауди“ на Светскиот шампионат во Формула 1 ќе учествува како снабдувач на мотори од 2026 година, пренесува Агенција Анадолија (АА).

Маркус Дусман, главниот извршен директор на „Ауди“, чии ставови се вклучени во изјавата на веб-страницата на Формула 1, истакна дека во нивниот избор за учество, правилата на погонската единица кои ќе стапат на сила во 2026 година, играат клучна улога.

Од 2026 година електричните единици ќе ја задржат архитектурата на постоечките V6-мотори со турбо полначи, но ќе имаат зголемена електрична енергија и 100 проценти одржливи горива.

Во изјавата на „Ауди“, кој за првпат во својата историја ќе учествува во Формула 1, се наведува дека тимот со кој ќе соработуваат ќе биде објавен на крајот на годината.

Се очекува „Ауди“ да купи акции од швајцарскиот тим Заубер, кој на Шампионатот се натпреварува под името Алфа Ромео.