Џејк Саливан: Претседателот Бајден е јасен и недвосмислен во врска со испраќањето Ф-16 во Туркије

ИСТАНБУЛ (АА) - Американскиот претседател Џо Бајден е „јасен и недвосмислен“ во врска со испраќањето Ф-16 во Туркије, изјави американскиот советник за национална безбедност Џејк Саливан, јавува Анадолу.

„Претседателот Бајден со месеци е јасен и недвосмислен дека го поддржува трансферот на Ф-16 во Туркије“, изјави Саливан за новинарите на прес-конференцијата како дел од Самитот на НАТО во литванскиот главен град Вилнус.

„Ова е во наш национален интерес, во интерес на НАТО е Туркије да ја добие таа способност“, нагласи тој.

„Тој не постави никакви предупредувања или услови за тоа во неговите јавни и приватни коментари во изминатите неколку месеци и има намера да продолжи со тој трансфер и консултации со Конгресот“, додаде Саливан.

Запрашан за времето на трансфер на Ф-16, тој рече дека ќе работат со Конгресот на соодветниот тајминг за да се изврши трансфер во Туркије.

„Но не можам да шпекулирам за точниот ден кога ќе се случи тоа, само дека поддржуваме тоа да биде завршено“, рече Саливан.

Анкара побара борбени авиони Ф-16 и комплети за модернизација од САД во октомври 2021 година. Договорот вреден 6 милијарди долари ќе опфаќа продажба на 40 авиони, како и комплети за модернизација за 79 воени авиони што веќе се во инвентарот на турските Воздухопловни сили.