Јапонија: 240 лица сè уште се водат за исчезнати по силните земјотреси

ИСТАНБУЛ (АА) - Најмалку 240 лица сѐ уште се водат како исчезнати и пет дена по силните земјотреси што ја погодија Јапонија за Нова година, јавува Анадолу.

Бројот на загинати во земјотресите денес се искачи на 92, објави токискиот „Кјодо њуз“.

Јапонија го зголеми бројот на распоредени војници во регионот Ното во префектурата Ишикава, епицентар на земјотресот со јачина од 7,6 степени.

Од понеделникот низ земјата се регистрирани над 600 потреси.

Многу луѓе сè уште се заробени под урнатите објекти додека екипите за пребарување и спасување се борат со суровото време за да најдат преживеани.

Околу 33.000 луѓе се евакуирани во околу 370 засолништа во префектурата Ишикава, која се соочи со најголеми човечки загуби и оштетувања на инфраструктурата.

Многу области сè уште се отсечени, а властите не можат да стигнат до најмалку 700 луѓе, електрична енергија немаат околу 30.000 домови, а 80.000 домаќинства во префектурата се без вода.

Американската војска, по земјотресите, ја прошири помошта за Јапонија, а двете страни разработуваат планови за работа на американските војници заедно со Јапонските сили за самоодбрана во областите погодени од земјотресот.

Во меѓувреме, денес беа откажани 200 лета на аеродромот Ханеда во Токио бидејќи една од четирите писти допрва треба да се отвори по инцидентот во средата меѓу авионите на „Јапан ерлајнс“ и Јапонската крајбрежна стража.