Alyssa Mcmurtry
29 Април 2025•Ажурирај: 29 Април 2025
ОВИЕДО (АА) – Шпанскиот премиер Педро Санчез доцна синоќа соопшти дека осум од 17-те региони во земјата се во вонредна состојба поради масовниот прекин на електричната енергија, јавува Анадолу.
Властите на Андалузија, Кастиља-Ла Манча, Галиција, Ла Риоха, Мурсија, Мадрид, Валенсија и Екстремадура побараа прогласување вонредна состојба, што ѝ овозможува на централната влада да го координира одговорот, меѓу кој и мобилизирање на војската доколку е потребно.
Во обраќањето веднаш по 23 часот по локално време, Санчез рече дека електричната енергија е вратена во речиси половина Шпанија по ненадејниот прекин низ Иберискиот Полуостров кратко по 12:30 часот.
Снабдувањето со електрична енергија, кое се враќа со помош на енергетските конекции со Франција и Мароко, се врати нерамномерно, при што во некои региони речиси целосно е вратено напојувањето со електрична енергија, а во други само 15 % од мрежата.
„Националната мрежа не може да каже колку време ќе биде потребно за да се врати нормалната состојба“, рече тој, повикувајќи ги работниците кои не се неопходни да избегнуваат ризикување на нивната безбедност и најавувајќи дека многу училишта нема да работат.
Санчез, исто така, повика на смиреност, велејќи дека немало никакви проблеми со безбедноста.
„Не ги знаеме причините. Не исклучуваме никаква хипотеза“, рече тој претходно во текот на денот.
Во текот на вчерашниот ден, голем дел од транспортниот систем на Шпанија беше запрен. Метроата и возовите престанаа со работа, додека поголемите градови доживеаја сообраќаен застој откако семафорите откажаа.
Илјадници луѓе мораа да бидат извлечени од лифтовите, а околу 150 вакви инциденти се пријавени само во Мадрид, според градоначалникот на метрополата.
Досега, шпанските медиуми објавија за повеќе сообраќајни несреќи, но не и за големи грабежи или погоденост на критичната инфраструктура како болниците.
Санчез ги повика граѓаните да останат смирени, да ги штедат батериите на телефоните и да избегнуваат шпекулации или ширење дезинформации за причините за прекинот на електричната енергија.
Според шпанскиот дневен весник „Ел Паис“, ова е најголемиот прекин на електричната енергија во историјата на Шпанија.
Прекинот на електричната енергија предизвика и големи прекини и во Португалија, чиј премиер рече дека проблемот потекнува од проблемите во шпанскиот енергетски систем.
