Шолц: „Директен конфликт меѓу НАТО и Русија го зголемува ризикот од нуклеарна војна“

БЕРЛИН (АА) - НАТО мора да избегне отворен воен конфликт со Русија што може да го зголеми ризикот од нуклеарна војна, изјави германскиот канцелар Олаф Шолц во интервју објавено денеска, пренесува Агенција Анадолија (АА).

„Многу рано реков дека мора да направиме сѐ што е можно за да избегнеме директна воена конфронтација меѓу НАТО и високовооружена суперсила како Русија, нуклеарна сила“, изјави Шолц за магазинот „Шпигел“ (Der Spiegel).

„Правам сè за да спречам ескалација што води кон трета светска војна. Не смее да има нуклеарна војна.“

Неговите коментари дојдоа по зголемените критики поради одбивањето на Германија да испрати тешко вооружување во Украина.

Шолц предупреди дека неговата земја може да се смета за страна во војната доколку испрати опрема како тенкови.

„Затоа е уште поважно да го разгледаме секој чекор многу внимателно и тесно да се координираме еден со друг. За мене главен приоритет е да се избегне ескалација кон НАТО“, рече Шолц.

„Затоа не се фокусирам на анкети и не дозволувам да бидам иритиран од остри повици. Последиците од грешка би биле драматични“, додаде тој.

Кон крајот на февруари Шолц стави крај на долгогодишната политика на Германија да не испраќа оружје во конфликтните зони со тоа што одобри испорака на стотици противтенковски и противвоздушни проектили за Украина.

Со промена на политиката, тој најави и специјален фонд од 100 милијарди евра за зајакнување на воените капацитети на Германија.