Alma Dekovic
11 Јули 2022•Ажурирај: 12 Јули 2022
СРЕБРЕНИЦА (АА) - Кој и да се обиде да го негира тоа што се случило во Сребреница живее во свесно избрано незнаење, порача високиот претставник на меѓународната заедница во Босна и Херцеговина, Кристијан Шмит, обраќајќи се на комеморацијата по повод 27-годишнината од геноцидот во Сребреница, јавува Агенција Анадолија (АА).
„Секој пат кога ќе дојдам на ова свето место, чувствувам тежок товар: товар на фаталната агресија на младоста која имала толку многу надеж за иднината; против мажите среде нивните животи, среде грижата за нивните семејства; против старите кои ги собираа сите свои достигнувања за идните генерации; агресија против сите нас, човековиот род. Го чувствувам и товарот на неуспехот на меѓународната заедница да ги заштити оние кои беа изложени на закани дека ќе бидат убиени“, рече Шмит.
Тој истакна дека е света должност сите да оддадат почест кон оние кои денес ќе бидат закопани и да го спречат повторното нанесување таква болка.
„Се собравме за да оддадеме чест на жртвите во геноцидот. Кој и да се обиде да го негира тоа што се случило во Сребреница и околу, кој и да се обидува да го негира геноцидот, да го намали бројот на жртвите во обид да ја намали вината за разни злосторства, тој живее затворен во светлото на избраното незнаење. Тоа што се случило во Сребреница, пред 27 години, беше единствено во историјата на војување во БиХ“, порача високиот претставник.
Тој потсети дека Канцеларијата на високиот претставник донела одлука за забрана и казнување за негирање на геноцидот и порача дека ОХР ќе ја спроведе својата обврска.
„Сите заедно треба да се посветиме на иднината во која идните генерации можат да уживаат во оваа земја и да ги земеме во свои раце прашањата за примирјето. Мораме да бидеме подобри“, рече Шмит.
Тој додаде дека е неопходно да се сеќаваме и на другите места на страдањата во БиХ и да работиме на сочувување на сеќавањето на секоја жртва „чиј живот е згаснат поради омразата и стравот“.
„Секој обид да се оправда масакрот на невино настраданите жртви, обид да се промени насоката на универзалниот компас, никогаш на може да биде оправдан“, рече високиот претставник.
Додаде дека лекцијата која е научена во Сребреница никогаш не смее да биде заборавена, а тоа е дека „политиката на омраза, огорченост и страв не носи ништо освен страдање и несреќа“.
„Мора сите да работиме во настојувањето да спречиме да се повтори, мора да стане наше определување не само на 11 јули, тоа мора да го пренесеме на идните генерации, кои заслужуваат да знаат што се случило тука“, рече Шмит.
На крајот додаде дека денеска е ден на жалост, ден на комеморација, но и „ден на надежта“.
„Мирна и просперитетна иднина за луѓето во оваа земја е нашата најголема обврска“, рече Шмит.
Денеска со колективен погреб и со закоп на посмртните останки, во вечен мир ќе бидат испратени 50 жртви на геноцидот.
На гробиштата во Меморијалниот центар Сребреница - Поточари досега се закопани 6.671 жртва од геноцидот кој тогашната војска на Република Српска (РС), паравоени и полициски формации од Србија и РС под команда на воениот злосторник Ратко Младиќ, го извршила над Бошњаците во Сребреница во 1995 година.
