БРИСЕЛ (АА) – Генералниот секретар на НАТО, Марк Руте, денес остро предупреди дека секој можен напад од Русија врз Балтичкиот Регион ќе биде пресретнат со „разорен“ одговор, повторувајќи ја силната заложба на алијансата за одбрана на секој сантиметар од нејзината територија.

На прес-конференцијата во пресрет на состанокот на министрите за одбрана на НАТО, кој ќе се одржи во четврток во Брисел, Руте ја истакна неопходноста од зајакнување на одвраќањето и одбранбените капацитети во услови на растечки глобални закани.

Во врска со потенцијален руски напад врз Балтикот, Руте изјави:

„Владимир Путин треба да знае дека ако се обиде со тоа, нашиот одговор ќе биде разорен. И тој го знае тоа. Она што мора да го обезбедиме е тој одговор не само да биде разорен денес, туку и по три, пет, седум години отсега. Затоа мора повеќе да инвестираме во безбедноста на Балтичкиот Регион.“

Руте истакна дека зголемувањето на трошоците за одбрана е клучно, додавајќи дека иако поголем дел од сојузниците се на пат да го постигнат целниот праг од 2 отсто од БДП годинава, „мора да одиме понатаму и побрзо“ за да се надминат постојните празнини во колективните одбранбени планови на НАТО.

Тој ги отфрли шпекулациите за можноста САД да повлечат трупи од Европа и ги повика сојузниците да престанат да ја доведуваат во прашање американската посветеност кон НАТО, нагласувајќи дека е време секој да ја преземе својата одговорност.

„Во моментов нема планови за повлекување на американските трупи. Она што го знаеме е дека САД целосно му се посветени на НАТО. Но тие очекуваат европските и канадските сојузници да трошат многу повеќе“, додаде Руте.

Генералниот секретар потврди и дека Украина е поканета да учествува на самитот на НАТО што ќе се одржи во Хаг од 24 до 26 јуни.

Состанокот во четврток има цел да ги постави основите за самитот, каде што се очекуваат одлуки за нови амбициозни цели, како што се воздушната и ракетната одбрана, оружјето со долг дострел и големите копнени маневарски формации.

Министрите ќе разговараат и за нов план за инвестиции во одбраната и ќе заседаваат во рамките на Групата за нуклеарно планирање, како дел од напорите за одвраќање на закани и зачувување на мирот преку кредибилни капацитети.