Шефот за надворешна политика на ЕУ изрази надеж за прекин на огнот во Газа наскоро

АТИНА (АА) - Шефот за надворешна политика на ЕУ, Жозеп Борел, денес изрази надеж дека наскоро може да се постигне прекин на огнот меѓу Израел и Хамас за да се запре тековниот конфликт во Газа, пренесува Анадолу.

„Постојат преговори што сè уште се во тек и сите се надеваме дека може да се постигне договор во наредните денови“, изјави тој за шпанското јавно радио РНЕ.

На разговорите во средата со американскиот државен секретар Ентони Блинкен за време на посетата на Вашингтон, Борел рече дека САД инсистираат на ослободување на сите израелски заложници од Хамас за прекинот на огнот да биде траен.

Што се однесува до тековните напори за праќање поголема хуманитарна помош во Газа, очигледно осврнувајќи се на напорите на САД да донесат помош по воздушен и морски пат, тој рече: „Пред војната дневно влегуваа 500 камиони, доколку нема друга опција, подобро по море отколку никако. Но, да бидеме реални, сообраќајот на 500 камиони не може да се замени со фрлање храна со падобран.“

Израел спроведува смртоносна воена офанзива врз Појасот Газа по прекуграничниот напад на палестинската група Хамас на 7 октомври, во кој беа убиени околу 1.200 луѓе.

Оттогаш во Газа се убиени повеќе од 31.000 Палестинци, главно жени и деца, а над 73.000 се повредени во услови на масовно уништување и недостиг на неопходни работи.

Според Обединетите нации (ОН), израелската војна принуди 85 отсто од населението на Газа внатрешно да се раселат поради целосната блокада на храна, чиста вода и лекови, а 60 отсто од инфраструктурата на енклавата се оштетени или уништени.

Израел е обвинет за геноцид пред Меѓународниот суд на правдата. Привремената пресуда во јануари му нареди на Тел Авив да ги запре геноцидните дејства и да преземе мерки за гарантирање дека хуманитарната помош ќе стигне до цивилите во Газа.