Шефовите на дипломатиите на САД, Јужна Кореја и Јапонија ќе разговараат за ракетните тестови на Северна Кореја

СЕУЛ

Шефовите на дипломатиите на Соединетите Американски Држави (САД), Јужна Кореја и Јапонија утре ќе разговараат за честите тестирања на севернокорејските ракетни проектили на Северна Кореја и тензиите предизвикани од оваа практика во регионот, јавува Агенција Анадолија (АА).

Американскиот државен секретар Ентони Блинкен утре во Хонолулу, Хаваи, ќе се сретне со јужнокорејскиот колега Чунг Еуи-Јонг и јапонскиот колега Ошимас Хајаши.

Новинската агенција „Јонхап“ јавува дека разговорите меѓу специјалните претставници на трите земји за Северна Кореја биле одржани пред трилатералниот состанок и на нив било договорено за потребата од ангажман со Пјонгјанг за мирно намалување на тензиите на Корејскиот Полуостров.

„Имавме многу добра, многу детална, суштинска дискусија за последните случувања. Мислам дека постои многу силен консензус меѓу трите земји за важноста на трилатералната соработка и координација во сите аспекти на нашата политика кон Северна Кореја“, ги пренесува „Јонхап“ зборовите на специјалниот претставник на Вашингтон, Сунг Ким, по состанокот со јужнокорејскиот и јапонскиот колега.

Северна Кореја изврши седум потврдени ракетни тестови во јануари оваа година, вклучително и тестирањето на новоразвиените хиперсонични проектили.

Јужнокорејскиот претседател Мун Џае-Ин вчера му понуди нова шанса за дијалог на севернокорејскиот лидер Ким Џонг-Ун, велејќи дека е подготвен да одржи состанок каде било. Сепак, Пјонгјанг досега не одговорил на понудите од САД и Јужна Кореја.