Шефицата на палестинската дипломатија се надева дека Јапонија ќе ја признае Палестина

ИСТАНБУЛ (АА) - Палестинската министерка за надворешни работи, Варсен Агабекијан, изрази надеж дека Јапонија што е можно поскоро ќе ја признае Палестина како држава, пренесува Анадолу.

„Мислам дека Јапонија е мирољубива земја и земја што ги почитува законите и ги почитува човековите права, и како таква е сосема природно што ќе истапи со признание“, рече министерката во интервју за „Кјодо њуз“ во Рамала, окупираниот Западен Брег.

„Се надевам дека ќе се предомислат што е можно поскоро“, додаде таа, нагласувајќи дека во Појасот Газа се случува геноцид од 2023 година.

Агабекијан го изрази своето „разочарување“ од одлуката на Јапонија засега да не ја признава палестинската државност и го повика Токио да го преиспита својот став.

Јапонскиот министер за надворешни работи Иваја Такеши изјави во петокот дека Јапонија ќе се воздржи од признавање на палестинската држава и дека „во догледно време“ ќе објави какви било чекори кон признавање на Палестина.

„Но, прашањето што останува е кога тоа ќе биде, кога ќе биде времето за тоа“, рече Иваја.

Агабекијан рече: „Беше јасно дека Јапонија, во овој конкретен момент, нема да ја признае бидејќи аргументот е дека тие треба да учат и да поминат низ процес. Но, мојот одговор на тоа е, колку долго треба да учат под околностите со кои се соочуваме во моментов?“, рече таа.

Агабекијан посочи на извештаите „во кои насекаде се вели дека се врши геноцид, дека прекршувањата на Западниот Брег се спротивни на меѓународното право“.

Таа, исто така, ја нагласи важноста од овластување на Палестинската самоуправа за реализација на решението за две држави.

Агабекијан рече дека хуманитарната и другата помош може да се намали „доколку имаме контрола врз нашата сопствена држава и нашите сопствени ресурси“.

Во неделата, Велика Британија, Канада, Австралија и Португалија објавија признавање на Палестина, со што вкупниот број земји членки на ОН што го презедоа овој чекор се искачи на 153 од вкупно 193.

Многу други земји - вклучувајќи ги Малта, Луксембург, Франција, Белгија и Ерменија - објавија планови за проширување на признавањето за време на 80-тата сесија на Генералното собрание на ОН оваа недела во Њујорк.

Истражителите на ОН неодамна заклучија дека Израел врши геноцид во Газа, каде што од октомври 2023 година се убиени повеќе од 65.000 Палестинци.