Atila Altuntaş
09 Август 2022•Ажурирај: 10 Август 2022
СТОКХОЛМ (АА) - Шведскиот надбискуп од јужниот шведски град Вексје, Фредрик Модеус, ги осуди провокациите со палење на Куранот од страна на Расмус Палудан, лидерот на данската екстремно десничарска партија Страм курс, јавува Агенција Анадолија (АА).
Палудан веќе седум дена во рамките на предизборната кампања провоцира со спалување на Куранот под заштита на полицијата во населбите во кои живеат муслимани.
Остро реагирајќи на провокациите на екстремно десничарскиот политичар, надбискупот на Вексје, Фредрик Модеус, преку Твитер порача: „Го осудувам ова непочитување на светата книга на моите муслимански браќа. Изразувам свое сочувство со муслиманите во Шведска.“
Палудан, кој има данско и шведско државјанство, од 2017 година провоцира со спалување на Куранот во разни градови на Данска.
Во текот на Рамазан, муслиманскиот месец на постот, минатата година, Палудан исто така провоцираше во присуство на полицијата во близина на муслиманските населби и џамии.
Партијата Страм курс е екстремно десничарска политичка партија во Данска, што во 2017 година ја основаше данскиот адвокат Расмус Палудан. Партијата е исклучиво поврзана со нејзиниот основач и неговиот антиисламски активизам и демонстрации.
Партијата учествуваше на општите избори во Данска во 2019 година кога доби 1,8 отсто од гласовите и остана под изборниот цензус, кој изнесува два отсто.
