Четириесет Палестинци загинаа во израелските воздушни напади врз Газа

ГАЗА (АА) - Најмалку 40 Палестинци загинаа, а околу 100 се ранети во израелските воздушни напади врз Појасот Газа, објави вчера Канцеларијата за печат на Газа, пренесува Анадолу.

„Израелската окупациска армија изврши страшен масакр во центарот на Газа, каде што борбени авиони бомбардираа четири цивилни дома, што резултираше со смрт на 40 луѓе и повеќе од 100 ранети“, објави канцеларијата за медиуми на Телеграм.

Тие нагласија дека повеќе од 90 отсто од жртвите се жени и деца.

Прес-службата смета дека „американската администрација, меѓународната заедница и (израелската) окупација целосно се одговорни за овие тековни злосторства“.

Тој го повика „слободниот свет веднаш и итно да ја запре геноцидната војна што ја води окупаторската армија против цивилите, вклучително и деца и жени“.

Бројот на загинатите Палестинци во смртоносната офанзива на Израел врз Појасот Газа од 7 октомври, според податоците од утринава, се зголеми на 29.410.

По обвинението за геноцид што го поднесе Јужноафриканската Република, Меѓународниот суд на правдата на 26 јануари пресуди дека Израел мора да се воздржи од какви било активности поврзани со убивање, напади и уништување на жителите на Газа и да ги преземе сите мерки за да спречи геноцид.

Меѓутоа, израелските сили и понатаму продолжуваат со нападите врз Појасот Газа.

Според податоците на Обединетите нации, поради израелските напади, 85 отсто од населението на Појасот Газа се внатрешно раселени и се соочуваат со акутен недостиг на храна, чиста вода и лекарства, а околу 60 отсто од инфраструктурата во Појасот Газа се оштетени или уништени.