Чавушоглу: „По посетата на Русија и Украина, нашата надеж за прекин на огнот се зголеми малку повеќе“

ЛАВОВ (АА) - Министерот за надворешни работи, Мевлут Чавушоглу, истакна дека како резултат на неговата посета на Украина и Русија, малку повеќе е зголеменa надежта за прекин на огнот, јавува Агенција Анадолија (АА).

Чавушоглу, по посетата на Москва, денеска се сретна со украинскиот министер за надворешни работи, Дмитро Кулеба во Лавов, Украина, за да разговара за руско-украинската војна.

По средбата министрите Чавушоглу и Кулеба одржаа заедничка прес-конференција.

Чавушоглу, заблагодарувајќи се на својот колега што одвои време за него во овие тешки денови, рече: „Нашиот состанок за стратешко планирање го одржавме овде, во Лавов, на 8 октомври. Особено во овие тешки денови сакавме да дојдеме во Лавов и да ја покажеме нашата поддршка за нашиот стратешки партнер Украина.“

Потсетувајќи дека војната трае од 24 февруари и дека илјадници цивили ги загубија животите, Чавушоглу рече дека повеќе од 3 милиони невини луѓе морале да ја напуштат својата земја и дека жалат за тоа.

- „Продолжуваме со нашите напори за воспоставување мир“

Нагласувајќи дека оваа војна треба што поскоро да заврши, Чавушоглу рече дека треба да се прекине со крвопролевањето и солзите.

„Од првиот ден ги интензивиравме нашите напори во оваа насока. Во таа смисла ги сретнавме мојот пријател Кулеба и рускиот министер за надворешни работи, Лавров во Анталија. Би сакал да му се заблагодарам на Кулеба за неговиот конструктивен пристап на таа средба“, рече Чавушоглу.

Министерот Чавушоглу, исто така додаде:

„Од една страна, додека траат преговорите во Белорусија, ние продолжуваме со нашите напори за воспоставување мир. Затоа вчера бев во Москва. Денеска го информирав Кулеба за прашањата покренати во Москва и нашите впечатоци. Претседателот Ердоган вчера телефонски разговараше и со претседателот Зеленски, а денеска ќе има телефонски разговор и со рускиот претседател Путин.“

Истакнувајќи дека целиот свет што ја гледа борбата на Украина и на украинскиот народ е против оваа војна, министерот Чавушоглу рече дека целосно го поддржуваат територијалниот интегритет, независноста и суверенитет на Украина и дека поддршката на Украина е природен резултат на принципиелната политика, сојузништво и стратешко партнерство на Турција.

Чавушоглу, истакнувајќи дека помошта, особено на хуманитарните полиња, ќе продолжи и понатаму, рече дека Турција од самиот почеток покажа принципиелен однос во овој процес.

„Ќе бидеме среќни доколку уште еднаш ги сретнеме Кулеба и Лавров во Анталија. Основата за средба на ниво на лидери мора да се подготви што е можно поскоро. Претходно изјавивме дека сакаме да бидеме домаќини на средба на ниво на лидери. Како резултат на овие две посети, се разбира, би било тешко да се каже нешто дефинитивно за војните, но нашата надеж за прекин на огнот се зголеми малку повеќе“, нагласи Чавушоглу.

Министерот Чавушоглу, наведувајќи дека Украина ја понудила Турција како еден од гарантите за безбедносната димензија на евентуалниот договор, рече дека Русија немала забелешки на тоа.

На прашањата за информациите дека Велика Британија, САД и Турција ќе бидат земји гаранти, за можниот прекин на огнот и за средбата Путин - Зеленски, Чавушоглу рече: „Украина даде понуда за Договорот за колективна безбедност: П5 + Турција и Германија. За време на моите вчерашни контакти во Москва, видов дека Руската Федерација нема ништо против ова и дека може да прифати таква понуда.“

Нагласувајќи дека е важно да се постигне договор кој двете држави, влади и народи можат да го прифатат, Чавушоглу рече: „Постои можност двајцата лидери да се сретнат доколку има договор за прашањата за кои има приближување на ставовите.“

Потсетувајќи дека украинскиот претседател Владимир Зеленски истакнал дека сака да се сретне со рускиот претседател Владимир Путин во Турција, Чавушоглу рече дека тие сакаат да бидат домаќини на таа средба.