АНКАРА (АА) – Цунами-бранови денес погодија дел од јапонскиот пацифички брег, откако разорен земјотрес со јачина од 8,8 степени го погоди регионот кај рускиот полуостров Камчатка, објави јапонскиот јавен сервис НХК, јавува Анадолу.

Властите повикаа десетици илјади жители од погодените подрачја да останат евакуирани сè додека не биде повлечено предупредувањето.

Според Јапонската метеоролошка агенција, бран висок 60 сантиметри бил забележан во пристаништето Куџи во префектурата Ивате и во градот Хаманака во Хокаидо. Во пристаништето Ишинонаки во префектурата Мијаги биле измерени бранови високи 50 сантиметри.

Покрај тоа, регионот Тохоку и делови од Канто забележале пораст на морското ниво, вклучително и бран од 30 сантиметри во пристаништето Јокохама.

Претходно во текот на денот, помали бранови се регистрирани покрај источниот брег на Хокаидо – 30 сантиметри во пристаништето Ханасаки во градот Немуро во 10:30 часот по локално време (01:30 GMT), потоа во Хаманака во 10:36 и во пристаништето Куширо во 10:42 часот.

Јапонските власти издадоа наредба за евакуација и повикаа сите жители кои живеат во близина на брегот или покрај реките веднаш да се упатат кон повисоките и безбедни места, каде треба да останат сè додека предупредувањето за цунами не биде официјално повлечено.

Цунами-брановите, исто така, го погодија воздушниот и копнениот сообраќај во некои делови од земјата.

Пистите на аеродромот Сендаи, во североисточниот дел на Јапонија, биле затворени, а неколку летови биле пренасочени или откажани. Железничкиот сообраќај во некои области бил привремено суспендиран.

Полуостровот Камчатка во Русија и претходно бил погоден од силни земјотреси и цунами, но според експертите, овој земјотрес е најсилниот во модерната историја на регионот.

Американската геолошка служба (USGS) соопшти дека земјотресот со јачина од 8,8 степени предизвикал серија предупредувања за цунами низ целиот Пацифички Регион.

Епицентарот бил на длабочина од 20,7 километри и на 119 километри источно-југоисточно од градот Петропавловск-Камчатски.