Хезболах со прва изјава по прекинот на огнот, ја потврди подготвеноста против идни агресии на израелската војска

БЕЈРУТ (АА) - Хезболах излезе со својата прва изјава по стапувањето на сила на прекинот на огнот меѓу Либан и Израел утрово, потврдувајќи ја својата подготвеност да се спротивстави на какви било идни израелски агресии, пренесува Анадолу.

„Нашите сили ќе останат целосно подготвени за справување со амбициите и агресијата на израелскиот непријател“, се вели во соопштението 17 часа по стапувањето во сила на договорот.

Групата вети дека внимателно ќе го следи повлекувањето на израелските сили од јужен Либан. „Очите на нашите борци ќе останат вперени во движењето и повлекувањето на непријателот надвор од границите, и нивните раце ќе останат на чкрапалото за одбрана на суверенитетот на Либан“, се додава во соопштението.

Договорот за прекин на огнот стапи на сила рано утрово и стави крај на над 14-месечните борби меѓу израелската армија и Хезболах.

Израел постепено ќе ги повлече силите јужно од Сината линија, додека либанската армија ќе ги распореди своите трупи во јужен Либан во период не подолг од 60 дена, според условите на договорот.

Договорот меѓу Израел и Либан стапи на сила неколку часа откако американскиот претседател Џо Бајден рече дека е прифатен предлог за ставање крај на конфликтот, во исчекување на запирањето на израелските воздушни напади врз либанските села и градови и ставањето крај на едногодишните прекугранични борби.

Според либанските здравствени власти, во израелските напади во Либан од октомври минатата година убиени се над 3.800 луѓе, а раселени се над 1 милион Либанци.