Хамас ги објави имињата на тројцата Израелци кои ќе бидат ослободени во 5. рунда од размената на затвореници

ЕРУСАЛИМ (АА) - Хамас ги објави имињата на Израелците што ќе ги ослободи во 5. круг како дел од договорот за прекин на огнот и размена на заробеници во Газа, известува Анадолу.

Во соопштението објавено од страна на Бригадите Ал-Касам, военото крило на палестинската група за отпорот Хамас, се наведува дека тројца заробени Израелци ќе бидат ослободени утре како дел од договорот.

Во соопштението се истакнува дека затворениците кои треба да бидат ослободени се Ели Шараби, Ор Леви и Охад Бен Ами.

Познато е дека еден од затворениците, Охад Бен Ами, е со двојно, германско и израелско државјанство.

Во соопштението се наведува дека списокот на затвореници е доставен до посредниците.

Весникот „Једиот ахронот“ објави дека израелската страна изјавила дека списокот доставен до посредниците е прифатлив.

Израелските медиуми тврдат дека Хамас го одложува предавањето на имињата на затворениците затоа што Израел постапувал спротивно на неговите обврски од договорот за прекин на огнот и размена на заробениците во Газа.

- Договор за прекин на огнот и размена на заробеници Израел - Хамас

Договорот за прекин на огнот и размена на заробеници постигнат меѓу Хамас и Израел стапи на сила во неделата, на 19 јануари, во 10:15 часот по средноевропско време.

Во првите 4 рунди од размената на заробеници беа ослободени 583 палестински затвореници во израелските затвори и 13 израелски и 5 тајландски заробеници во Газа.

Според трифазниот договор за прекин на огнот, во првата фаза од 42 дена се очекува да бидат ослободени повеќе од 1.900 Палестинци и 33 Израелци.