Уште 7 Палестинци починаа од глад во Газа, билансот порасна на 169

АНКАРА (АА) – Уште седум Палестинци, меѓу кои едно дете, починаа денес од глад и неисхранетост во Појасот Газа, соопшти Министерството за здравство во опколената енклава, јавува Анадолу.

Новите смртни случаи, регистрирани во изминатите 24 часа, го зголемија вкупниот број на смртни случаи поврзани со глад од октомври 2023 година на 169, од кои 93 се деца, истакна Министерството.

Предупреди дека хуманитарната криза во Газа продолжува да ескалира како резултат на израелската блокада, која сега е во својата 18-та година, спречувајќи го влезот на доволни количини храна и медицински материјали.

„Ситуацијата брзо се влошува“, нагласи Министерството, повторувајќи ги повиците до меѓународната заедница и хуманитарните организации веднаш да интервенираат за да го спречат страдањето и да достават итна помош.

Од 2 март, израелските власти целосно ги затворија сите гранични премини, интензивирајќи ги условите за глад низ енклавата.

Отфрлајќи ги меѓународните повици за прекин на огнот, израелската армија спроведува брутална офанзива врз Газа од 7 октомври 2023 година, во којашто се убиени над 60.000 Палестинци, повеќето од нив жени и деца. Немилосрдното бомбардирање ја уништи енклавата и доведе до висок ризик од глад.

Минатиот ноември, Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.

Израел се соочува и со случај за геноцид пред Меѓународниот суд на правдата за своите воени дејствија во енклавата.