Унгарската Влада вели дека пејџерите што експлодираа во Либан никогаш не биле во земјата

ЖЕНЕВА (АА) - Унгарската Влада денес соопшти дека пејџер уредите што експлодираа во Либан „никогаш не биле во Унгарија“, јавува Анадолу.

Владиниот портпарол Золтан Ковач даде изјава откако тајванската компанија „Голд Аполо“ негираше дека ги произвела пејџер уредите што експлодираа и рече дека тие биле произведени и продавани од унгарската компанија БАЦ Консалтинг КФТ, со седиште во Будимпешта, која имала лиценца за користење на брендот на „Голд Аполо“ за пејџерите.

„Властите потврдија дека компанијата за која станува збор е трговски посредник, без производствена или оперативна локација во Унгарија“, рече Ковач.

„Има еден менаџер регистриран на нејзината декларирана адреса, а споменатите уреди никогаш не биле во Унгарија“, наведе тој.


„Во текот на понатамошните истраги унгарските национални безбедносни служби соработуваат со сите релевантни меѓународни партнерски агенции и организации“, додаде портпаролот.
Тој рече дека случајот не претставува ризик за националната безбедност на Унгарија.

Либанските здравствени власти соопштија дека загинаа најмалку 21 лице, од кои две деца, а повеќе од 3.000 се повредени по експлозиите на пејџери во Либан вчера и денес.