ИСТАНБУЛ (АА) - Украина денес соопшти дека најмалку четири лица се убиени, а 13 се повредени во ноќниот напад на руски беспилотни летала врз североисточниот град Харков, јавува Анадолу.

„Според прелиминарните податоци, четири лица се убиени, а најмалку 13 се повредени, од кои две се деца“, се вели во соопштението на Државната служба за вонредни состојби на Украина на Телеграм, во кое се наведува дека цел на нападите биле градските области Шевченковски и Салтивски.

Во утринската изјава гувернерот на Харков, Олех Синјехубов, изјави дека вкупно 15 беспилотни летала биле лансирани кон градот ноќта.

„Во Харков беа оштетени седум приватни куќи, една станбена зграда, електрична мрежа, едно граѓанско претпријатие, четири автомобили и зграда на образовна институција“, додаде Сињехубов.

Во меѓувреме, во подоцнежна изјава на Телеграм украинските воздухопловни сили тврдат дека нивната воздушна одбрана соборила 125 од 162 различни видови беспилотни летала лансирани од Русија.

„Најмногу беа погодени објектите на цивилната инфраструктура и приватните домаќинства во регионите Харков, Чернигов и Днепропетровск“, се додава во соопштението.

Вториот по големина град во Украина, Харков, кој се наоѓа на околу 30 километри од руската граница, е редовно цел на воздушни напади за време на тековната три и полгодишна војна.

Локалните власти во регионите Чернигов и Днепропетровск не пријавија жртви.

Русија не даде веднаш коментар за нападот, иако нејзиното Министерство за одбрана тврди дека пресретнало 93 украински беспилотни летала лансирани кон земјата ноќта, од кои 45 биле соборени над граничниот регион Белгород.